Joèl,
Mwen kontan w jwenn lyen saa pou w mete sou sit lan.
Mwen gen seri an lakay mwen sou DVD e mwen pa t kapab jwenn mwayen pou poste l.
Wi se te yon bèl epòk e san entwoduy politik lan sijè saa, mwen kapab di ke tout bèl anbyans saa te vinn kraze avèk Divalye e tontonmakout yo.
Se te yon desant ozanfè total ki pase pran mizik, teyat, pwezi.
Tout yon domèn atistik ki te fè Ayiti briye dan le mond.
Issa Saieh te etidye mizik Ozetazini, li te gen yon avans sou lòt mizisyen ayisyen yo.
Gi Dirozye se te yon jeni ke tout diletant lan plizye peyi: Kanada, Kolonbi, Kiba, Ajantin ak kèk kote Ozetazini rekonèt kòm pi gran atis ayisyen. Mwen te konnen l pèsonèlman e li te konn ankouraje m lan mizik.
Jis lan ane 80 yo, Enès Lami avek Jo Trouyo avèk mwenmem ta p jwe lan Monreyal avèk okès Alfred Dòlet.
Okès Kazino entenasyonal lan te konpoze de Jo Trouyo, Chal Desalin, Webè Siko, Tonton Dirozo avèk Deroulo. Issa pa t lan gwoup saa, men li menm avèk yon aranjè Fineyas Kouba te konn ekri aranjman pou yo.
Te genyen yon pepinyè ki te konn bay mizisyen avèk bon entrenman solfèj, se te Fanfa Pale nasyonal, kote mizisyen te konn ap etidye e pratike 8e pa jou, tout sèmen nan.
Se te de vre pwofesyonèl. Anplis, yo te gen disiplinn, yon bagay ki pa genyen ankò.
Yon lòt gwo okès ki te reprezante Ayiti lan plizye peyi se te Jazz dè Jenn.
Saa se yon moniman otentik mizik folklorik Ayiti.
Se te okès ki te pi apwofondi lan mizik vodou, menm plis ke jan Issa dekri l lan dokimantè a. Laplipa misik yo te konpoze oubyen aranje pa Antalcidas Mira ki youn lan pi gran mizisyen ayisyen.
Mesye sayo kite yon kantite petèt de milye patisyon ki te dwe lan achiv nasyonal.
Mwen tande ke Preval te rekonstitye okès saa avèk kèk ansyen mizisyen epi nouvo.
Ma p pral eseye jwenn yon lyen sou nouvo Jazz de Jenn.
Accueil 
